Mat 20 | GAM | STEP | Jisas embe dji, God dumoye wopake kantau yendo mal embe yendo. Kune ge iwa kerman ta molo embe dji, na boi kogo una top tanaka kambono po wain mau kogo yene we dji. Tagika une po kogo una boll kandja dje awo ku wan kina wan kina dje auno we dji. Djika, kabono, kune, imbon we dje po kogo yei.

Matthew 20

Boi una wain mau po kogo yei

1 Jisas embe dji, God dumoye wopake kantau yendo mal embe yendo. Kune ge iwa kerman ta molo embe dji, na boi kogo una top tanaka kambono po wain mau kogo yene we dji. Tagika une po kogo una boll kandja dje awo ku wan kina wan kina dje auno we dji. Djika, kabono, kune, imbon we dje po kogo yei. 3 9 oklok yeika, iwa kerman ge po maket yei al kani una pende kiwa agle moi. 4 Une po embe dji, na wain mau ye pakna po kogo yeneke ku paro mal auno we dji. 5 Kambono mauye al er pi. Belo ye po 3 oklok pika, maket yei al una kiwa molmaka, iwa kerman ge alla po dje worika kambono er une mauye al pi.

6 Taman pika 5 oklok yeika, maket yei al una kiwa pa molmaka iwa kerman ge po embe dji, ye namba yei pille ege kanan kiwa mor ne? dji. 7 Djika kambono embe dji, una wo no kogo ta dje nawori we dji. Iwa Kerman embe dji, ye na mauna al po kogo yene we dji. Djika kambono er mau al pi.

8 Taman po emill pano dje yeika, iwa kerman bosboi moi al embe dji, kogo una porapora mor ge ni dje i pakna woro ku aumben. Are woi una kambono ge ni asamoll aumben; asamoll woi kambono ge ni are aumben we dji. 9 Taman pika, 5 kilok woi una ge wo wan kina wan kina dje i. 10 Asamoll woi una ge wo iwa kerman ku kerman aunda dje pi ba, une wan kina wan kina dje awi. 11 Kambono ke pille iwa kerman moi al kandja awo embe dji, 12 ga kambono ge wan awa wo kogo yei, alla no olpa do pai al kogo dongall yepin. Ni kambono no boll ku i kune ye aunden ge kune nayendo we dji. 13 Kogo boi una kambono ge taimanta moi al iwa kerman embe dji, agana, na ni ye ke ye naundo. Nono asamoll kandja dje kerpin, ye wan kina wan kina dje ine we djipin. 14 Ni ku in mal i piye! Na nomana paro mal pille ni ku in mal ge una are woi ge embe eri aundo. 15 Ge na walena. Na nomana paro mal nanam ku i una auno ge kune yendo. Mo, na una ye wopake ye awill pille, ni na ke kane djinden mo? dji. 16 Jisas embe dji, iwa kerman yei mal embe ge, are mor una wor wekle pineke, wekle mor una wor are pineke embe yene we dji.

Jisas na to goye we dje kune soka asamoll dji ge alla djindo

(Mak 10.32-34 ne, Luk 18.31-33)

17 Jisas kogoye una boll er Jerusalem bon dje yei. Kondwe tambiye po yenekne molmaka Jisas embe dji, 18 Jerusalem bonka, opa gale awinj una kerman ne, God lo dje awinj una wo, Una Wombe kot ye awo, ni ke yen, to gopon we djine. 19 Kambono i epil djell una auneke wo bakale awo, ka pall kapill to, iko pera al nil to goye. Ba ege sokara wor pundaka une agle wor gun punda we dji.

Jems ne Jon iwa kerman mopoll dje yepill

(Mak 10.35-45)

20 Iwa Sebedi warne soka mane boll Jisas moi al womaka, mane gopiye boglo embe dji, ni na wal ta aumbenba dji. 21 Jisas embe dji, na ni wal naral wal auno dje pren ne? dji. Ana ge embe dji, are, ni una kantau yemben kune ge, na warna soka wo ni boll ami dje mopell. Ta aglen woto moyaka, ta aglen darto moyaka embe yembell we dji. 22 Djika Jisas embe dji, ye kandja djinj ge pillpol nato djinj. Na kap ^{▼▼20.22Jisas “kap” we dji ge, yene imb kakda mal pille dji.} nano ge, ye nambell kune yendo mo? Soka embe djipill, no namboll kune yendo we djipill. 23 Dipillka Jisas pille embe dji, na kap nano ge ye soka kaima nambell. Ba, ye soka wo na aglena woto ne, darto mopell ge, na Nena yene nomane, na nomana, man. Nena yene iwa soka dje i mormell iwa ge, wo mopell we dji. 24 Djika kogoye una 10-pela pille ellne kumbso agane soka awi. 25 Jisas djika kogoye una alla womaka embe dji, una kerman epil djell mor ge iwa pla mopon dje pille yembe ye, una kantau ye mor. Ga iwa kerman kogo dongall ye awinj mal ge ye pille kane yenj. 26 Ba yenj mal ge ye embe nayene. Ye mor al ge, ye iwa kerman mopon dje pi dal, ye boi una moye. 27 Una wekle worbon dje yene ge ye nukogo una moye. 28 Na Una Wombe woll ge ye na amblo pille dje aune dje pille na nawoll. Na golo ye amblo pille dje awo, una merke top to i yem worno dje pille woll we dji.

Nalene emill yei iwa soka Jisas amblo au dje awi

(Mak 10.46-52 ne, Luk 18.35-43)

29 Jisas kogoye una boll er dumo Jeriko orko bon dje yemaka, una merke aike pi. 30 Jisas wo pundo we djimaka, nalene emill yei iwa soka kondwe djeke ami dje molo yau to embe djipill, Iwa Kerman, ni Depit wariye wonden ge no wandill golo awe! djipill. 31 Una merke man dje, ye soka kerse! dji. Ba soka napupill, yau kerman ke to, Iwa Kerman, Depit wariye wonden ge, ni no wandill golo awe! djipill. 32 Jisas wo agle molo embe dji, soka wombelle! dji. Una po iwa soka ge iumaka Jisas embe dji, na ye namba mal ye auno dje pirmell ne? dji. 33 Soka embe djipill, Iwa Kerman, no nalene amblo au dje aumben kanboll we djipill. 34 Jisas iwa soka wandill golo awo nalene al abika, kuntaimane nalene au djika, soka Jisas pi al are er pupill.